أكاديمية ستورى بوست
٥ طرق يساعدوك تكتب عنوان مميز
زي ما اتفقنا سابقًا،إن القارئ لو حس بملل أول 5 ثواني من البوست بتاعك، في الأغلب مش هيكمله لآخره. وأكيد مش هيكون فيه شير أو لايك.
وكمان اتفقنا إن الناس بتحب القصص. فلو عندك محتوى أيًا كان وقدرت تكتبه علي هيئة قصة، يبقي شيء ممتاز. وأهم حاجة ساعتها، هتكون إيه هي بداية أو مقدمة القصة ومدخلها "وده هنتكلم عليه لاحقاً".
لكن ده مايمنعش إن المحتويات المباشرة بتبقي مميزة ومحل اهتمام، وخصوصًا لو محتوى علمي أو معلوماتي أو عبارة عن نصائح مجردة، ولتكتبت بشكل مرتب ومتسلسل في قائمة وتوفرت فيها بعض الشروط اللي من أهمها إنه يكون في أولها عنوان مميز وجذاب.. وده موضوعنا اللي هنتكلم عليه.
أشهر 5 طرق يساعدوك تكتب عنوان مميز للبوست بتاعك:
١. استخدم الأرقام
الأرقام مهمة جدًا في وسيلة نشر زي السوشيال ميديا اللي مليئة بالمحتويات المتنوعة والكثيفة.. لذلك، وجود موضوع معروف بدايته ونهايته وكيفية تحقيقه في خطوات، بيجذب القارئ ويخليه يُقبل على قراءته. زي مثلًا:
- ٩ أرقام حطمها محمد صلاح في الدوري الإنجليزي.
- ٨ طرق بتستخدمهم عارضات الأزياء للحفاظ على أجساد رشيقة.
- ٧ أفلام مش هتقدر تفوتهم الصيف ده.
٢. استخدم "ماذا، متى، كيف، لماذا.."
استخدامك للأسئلة المحدودة، بتزيد فضول القارئ وتدفعه لقراءة البوست، وبيوصل له إنه موضوع بيعبر عن مجموعة معلومات محدودة ومركزة.
- تعرَّف علي موعد انتقال محمد صلاح لريال مدريد.. "متى"
- إيه اللي ممكن يحصل لك لو توقفت عن التدخين فجأة؟! "ماذا"
- إزاي تقدر تتغلب على الاكتئاب من غير أدوية؟! "كيف"
٣. استخدم كلمات وجمل توضح فائدة عملية مباشرة ومحسوسة هيحصل عليها القارئ من البوست بتاعك
افتكر إنك باستخدام الطريقة دي، هتكون بتتكلم عن معلومات وأشياء مادية، ولازم تكون بتستخدم كلمات مباشرة وصريحة.
وغالبًا الكلمات ديه بتيجي بعد ذكر الأرقام خمس "حقائق - طرق - أسرار - دروس - أسباب - خدع" ممكن تتعلمهم من (كذا). XXXX
4. قدم وعد "قابل للتحقيق"
دايمًا حُط في بالك أن القارئ مش بيتصفح وبس .. هو بيبحث عن شئ يساعده ويطور منه ويشبع احتياجاته.. ربما مايعرفش هي إيه بشكل مباشر .. لكنك ممكن تكون السبب إنه يطور من نفسه بشكلٍ ما.
- - "معلومات لم تكن تعرفها عن السفر إلى أوروبا"
هنا الوعد إنها فعلًا هتطلع معلومات عن السفر إلى أوروبا، القارئ ماكانش يعرفها.. أوغريبة إلى حد ما عنه.
5. استخدم كلمات عاطفية توصف حالة القارئ أو مشكلته اللي بتكلمه عنها
ربما معلومات اللي هتذكرها تتضمن شئ يتعلق بالعاطفة والنفسية.. فاحرص في الحالة دي على ذكر كلمات تعبر عن المشاعر، يتشارك فيها أغلب الناس
- - إزاي تتعامل مع زملائك اللي بيعصبوك في الشغل؟
- - 7 حاجات مش هيعرفهم غير اللي عاش طفولته في التسعينيات.
فيه طرق تانية لكتابة العنوان الجذاب لكن حاولنا نعرض منهم أهم خمسة!
لو عايز تعرف أكتر.. ادخل على الرابط ده
#أكاديمية_ستوري_بوست
مقالات ذات صلة
