مين اللي بيقرالك؟

النهارده، هنكمل إجابة على سؤال "إزاي البوست بتاعي يبقى قوي ومؤثر؟"

قولنا إن فيه 4 نقاط أساسيين، الاهتمام بيهم هيساعد محتواك على لفت الأنظار، زي:

1- قوة المحتوى"، والمقصود القصة نفسها".

2- توقيت نشر البوست.

3- بِنْية البوست.

4- دائرة الأصدقاء.

النهارده هنتكلم عن الجزء الرابع وهو "دائرة الأصدقاء"

وهنا هنتكلم عن نقطتين مهمين

١- النقطة الأولى والأهم هي "العدد"

كتير معتقدين إن عدد الأصدقاء على موقع زي فيسبوك على سبيل المثال، هو اللي بيخلي التفاعل على بوست معين يكون قوي وبيخلي البوست ده يوصل لأعداد أكبر! رغم إن ده في حد ذاته مش حقيقي، تعالوا نعرف إزاي..

لو عندك 100 صديق بس على فيسبوك، ولكن الـ 100 صديق نشطاء معظم الوقت، ومنهم 50 صديق بيتفاعل معاك باستمرار، ده ممكن يبقى أفضل بكتير من شخص تاني عنده 500 صديق بس بيتفاعل منهم معاه أقل من 20 شخص!

وزي ما أي نبتة بتحتاج لأرض خصبة تنمو فيها.. المحتوى بتاعك محتاج لمُتلقي جيد يستقبل المحتوى ده ويتفاعل معاه بشكل جيد عشان يقدر ينقله من علي صفحتك إلى مساحة أوسع لجمهور أكبر.

٢- النقطة الثانية هي "الثقافة"

لازم تعرف ثقافة شريحة الأصدقاء اللي عندك إيه، وإيه اللي بيحبوه وبيحبوا يتكلموا فيه، والمواضيع اللي بيحبوا يسمعوها. وهنا عندك 3 خيارات:

١- إما تتكلم بكلامهم ومواضيعهم ...

٢- أو تتكلم في مواضيع عامة، الجمهور الأغلب يكون متفق عليها

٣- أو توسّع شريحة أصدقاءك وتنوعها بشكل كبير

فيه طريق تاني بعض الناس بتستخدمه ألا وهو إنك تنقل كلامك وتنشر بوستاتك وتعرض آرائك وتعليقاتك، سواء في "جروب" على فيسبوك أو حتى على صفحات أخري. وده هنتكلم عنه بالتفصيل في مرة من المرات اللي جاية تحت عنوان:

"إزاي توصل للجمهور المُناسب؟"